Tuesday, April 4, 2017

နိုင်ငံတော်အစိုးရ၏ ပြည်သူ့အတွက် ပထမ တစ်နှစ်တာ (အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန) အပိုင်း-၂

ကျွမ်းကျင်မှုအကဲဖြတ်
မြန်မာနိုင်ငံလုပ်သားများ ကျွမ်းကျင်မှု စံသတ်မှတ်ပြဋ္ဌာန်းရေးအဖွဲ့ (NSSA)က အကောင်အထည်ဖော် ဆောင်ရွက်ခဲ့သည့် ကျွမ်းကျင်မှုအကဲဖြတ်ရေး ရှေ့ပြေးစီမံချက် ပထမအဆင့်နှင့် ဒုတိယအဆင့်များ တွင် အလုပ်အကိုင် ၁၁ မျိုးအတွက် အောင်မြင်ခဲ့သော သင်တန်းသား ၇၂၇ ဦးအား အမျိုးသားအဆင့် အလုပ်အကိုင်ဆိုင်ရာကျွမ်းကျင်မှု (Level-1) အသိအမှတ်ပြုလက်မှတ်များ ပေးအပ်ခဲ့ပြီးဖြစ်သည်။
ယခုတတိယအဆင့်မှာ ကျွမ်းကျင်လုပ်သား ၂၅၁ ဦးအား အမျိုးသား အဆင့် (၁) နှင့် (၂) ကျွမ်းကျင်မှုအသိအမှတ်ပြု လက်မှတ်များကို အလုပ်အကိုင် ၁၆ မျိုး အတွက် ရန်ကုန်မြို့ UMFCCI ၌ ကျင်းပခဲ့ သည့် အခမ်းအနားတွင် ထုတ်ပေးနိုင်ခဲ့သည်။
ပြည်ပအလုပ်အကိုင်လမ်းညွှန်
ပြည်ပနိုင်ငံများသို့ သွားရောက်အလုပ်လုပ်ကိုင်မည့် အလုပ်သမားများအတွက် ပြည်ပအလုပ်အကိုင် လမ်းညွှန်သင်တန်းကို ကျွမ်းကျင်မှုလေ့ကျင့်ရေး သင်တန်းကျောင်း (ရန်ကုန်)နှင့် (မန္တလေး)တို့တွင် ယခုနှစ် ဇန်နဝါရီလမှ စတင်အခမဲ့ဖွင့်လှစ်ပြီး ပြည်ပနိုင်ငံ၌ သွားရောက်အလုပ်လုပ်ကိုင်ရန် ကြိုတင်ပြင်ဆင်ခြင်း၊ နိုင်ငံများ၏ ပထဝီ၊ ပတ်ဝန်းကျင်နှင့် ယဉ်ကျေးမှု၊ လူကုန်ကူးမှုတားဆီးရေးဆိုင်ရာ သိသင့်သည့်အချက်များ၊ အလုပ် သမားရေးရာဥပဒေများ၊ လုပ်ငန်းခွင် ဘေးလုံခြုံစိတ်ချရသော ရွှေ့ပြောင်းသွားလာခြင်း၊ လူဝင်မှုကြီးကြပ်ရေးဆိုင်ရာ သိရှိသင့်သည့်အချက်များ၊ အလုပ်ရှင်၊ အလုပ်သမားသဘောတူစာချုပ်ပါ အချက် များ၊ ဆက်သွယ်အကူအညီ တောင်းခံမည့်နေရာများ၊ ပြည်ပထွက်ခွာခြင်း၊ အလုပ်လုပ်ကိုင်ခြင်းဆိုင်ရာ အသိပညာပေးခြင်း၊ ငွေကြေး စီမံခန့်ခွဲခြင်းတို့ကို သင်ကြားပို့ချလျက်ရှိကြောင်း သိရသည်။
ခေတ်မီဖွံ့ဖြိုးတိုးတက်သော နိုင်ငံတော်ကြီး တည်ဆောက်ရာတွင် အဓိကလိုအပ်ချက် ဖြစ်သည့် အရည်အချင်းပြည့်ဝသော လူသားအရင်းအမြစ်များ မွေးထုတ်ပေးရန်နှင့် ကျွမ်းကျင်လုပ်သားများ စဉ်ဆက်မပြတ်ရရှိစေရေးသည် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ လုပ်ငန်း တာဝန်တစ်ရပ်ဖြစ်ပြီး ယင်းဝန်ကြီးဌာနသည် ပညာရေးဝန်ကြီးဌာနအပါအဝင် ဝန်ကြီးဌာန ၁၈ ခုနှင့်ပူးပေါင်းကာ ကျွမ်းကျင်မှုလေ့ကျင့် ရေးသင်တန်းများဖြစ်သည့် အခြေခံဂဟေဆက်သင်တန်း၊ ကြီးကြပ်ရေးမှူးသင်တန်း၊ စစ်ဆေး ရေးမှူးသင်တန်း၊ လေအေးပေးစက်ပြုပြင်ခြင်းသင်တန်း၊ ကိုရီးယား ဘာသာ သင်တန်း၊ ပြည်ပ အလုပ်အကိုင်သင်တန်းနှင့် ပြည်ပသို့မထွက်ခွာမီ အကြိုသင်တန်းတို့ကို ပြီးခဲ့သည့်နှစ် ဧပြီ လမှ ယခုနှစ် ဖေဖော်ဝါရီလအထိ သင်တန်းသား သင်တန်းသူ ၂၉၈၅၄ ဦးတို့ကို သင်ကြားပေးနိုင်ခဲ့သည်။
လူမှုဖူလုံရေးဆိုင်ရာ
အလုပ်သမားတစ်ဦး နိစ္စဓူဝအလုပ်လုပ်နိုင်ရန်အတွက် ကျန်းမာရေးစောင့်ရှောက်မှုရှိရန် လိုအပ်သည်။ ယင်းလိုအပ်ချက်အတွက် လူမှုဖူလုံရေးအဖွဲ့က တာဝန်ယူဆောင်ရွက်လျက်ရှိပြီး အာမခံအလုပ်သမား များ အား ကျန်းမာရေး စောင့်ရှောက်မှုများပိုမိုပေး အပ်နိုင်ရန် ရည်ရွယ်၍ အလုပ်သမားဆေးရုံကြီး (ရန်ကုန်၊ မန္တလေး၊ ထန်းတပင်) ဆေးရုံများတွင် ခွဲစိတ်ရောဂါ၊ သားဖွားနှင့် မီးယပ်ရောဂါ၊ အရိုးရောဂါ၊ အထွေထွေရောဂါ၊ မျက်စိ၊ နား၊ နှာခေါင်း၊ လည်ချောင်းရောဂါ၊ သွားရောဂါ၊ ပြန်လည်သန်စွမ်းရေး ဆိုင်ရာကုသမှုများကို အထူးကု ဆရာဝန်ကြီးများဖြင့် ၂၄ နာရီ ဝန်ဆောင်မှုများ ပေးလျက်ရှိရာတွင် ပြီးခဲ့သည့်နှစ် ဧပြီလမှ ယခုနှစ် ဇန်နဝါရီလအထိ အလုပ်သမားဆေးရုံကြီး သုံးရုံတွင် ဆေးကုသမှုခံယူသည့် လူနာဦးရေမှာ ၇၁ဝ၂၈ ဦးရှိပြီး လုပ်ငန်းခွင်အရောက် ကွင်းဆင်းဆေးကုသပေးမှု ၈၂၈၁ ဦးရှိခဲ့ကြောင်း သိရသည်။
ယမန်နှစ် ဧပြီလမှ ယခုနှစ် ဇန်နဝါရီလအထိ လူမှုဖူလုံရေးဆေးခန်း ၉၆ ခန်းတွင် ဆေးကုသမှုခံယူခဲ့ သည့် ပြင်ပလူနာ ၃၅၅၇ဝ၄ ဦး၊ ဆေးရုံတက်လူနာ ၅၆၉၁ ဦး၊ ကျန်းမာရေးပညာပေးဟောပြောမှုနှင့် ကွင်းဆင်း ဆေးကုသမှုမှာ ၁၆၆ဝ ကြိမ်ဖြစ်ပြီး ကွင်းဆင်းဆေးကုသစဉ် ဆေးကုသမှုခံယူသည့် လူနာဦးရေမှာ ၃၁၂၇၄ ဦးဖြစ်သည်။ MMU နယ်လှည့်ဆေးကုသယာဉ်ဖြင့် အာမခံလုပ်သားများကို နယ်လှည့်ဆေးကု သပေး လျက်ရှိရာမှာ အလုပ်ဌာနပေါင်း ၁၃၄ဝ တွင်ရှိသော အလုပ်သမား ၃၄ဝ၃၅ ဦးကို အစိုးရသစ် တစ်နှစ်တာကာလအတွင်း ကုသပေးပြီးဖြစ်သည်။
ထို့အပြင် စစ်ကိုင်းတိုင်းဒေသကြီး ယင်းမာပင်ခရိုင် ဆားလင်းကြီးမြို့နယ်၌ လူမှုဖူလုံရေးဆေးခန်းကို ၂ဝ၁၆ ခုနှစ် စက်တင်ဘာလတွင် ထပ်မံတိုးချဲ့ဖွင့်လှစ်ပေးနိုင်ခဲ့ပြီး အာမခံအလုပ်သမားများအား ဆေးကုသမှုနှင့် ကျန်းမာရေးစောင့်ရှောက်မှုများ ထိရောက်စွာ ဝန်ဆောင်မှုပေးနိုင်ရန်အတွက် ပုဂ္ဂလိက ဆေးခန်းများနှင့် ပူးပေါင်းဆောင်ရွက်လျက်ရှိရာတွင် အာမခံအလုပ်သမားများပြားသည့် မင်္ဂလာဒုံမြို့နယ် တွင် လူမှုဖူလုံရေးကဲဝဲလ် ဆေးခန်းအား Care Well Medical Co., Ltd. နှင့်ပူးပေါင်း၍ ယခုနှစ် မတ် ၄ ရက်တွင် ဖွင့်လှစ်ခဲ့ပြီးဖြစ်သည်။
၂ဝ၁၂ ခုနှစ် လူမှုဖူလုံရေးဥပဒေပါ အကျိုးခံစားခွင့်များရရှိနိုင်ရေးအတွက် ၂ဝ၁၂ ခုနှစ် လူမှုဖူလုံရေး ဥပဒေ စတင်ပြဋ္ဌာန်းပြီးချိန်မှစ၍ ယခုနှစ် ဇန်နဝါရီလအထိ လူမှုဖူလုံရေးအာမခံ စိစစ်ရေးကတ်ပြား (Smart Card) ၆၉၇၇၈၁ ကတ်နှင့် ယာယီကတ် ၅၁၂၉၉၅ ကတ်ကို ထုတ်ပေးပြီးဖြစ်သည်။ အစိုးရသစ်တစ်နှစ်တာ ကာလအတွင်း Smart Card ၄၁ဝ၅၅ ကတ်နှင့် ယာယီကတ် ၂၈၈၃၁၅ ကတ်ကို ထုတ်ပေးခဲ့ပြီးဖြစ်သည်။ လူမှုဖူလုံရေးအာမခံစိစစ်ရေး ကတ်ပြားများအား Micro Processor Chip ပါဝင်ပြီး ပိုမိုထိရောက်စွာ အသုံးပြုနိုင်မည့် e-Smart Card များအဖြစ် ပြောင်းလဲထုတ် လုပ်နိုင်ရေးဆောင်ရွက်လျက်ရှိသည်။
လူမှုဖူလုံရေးအဖွဲ့၏ အဓိကလုပ်ငန်းများသည် ဥပဒေတွင်အကျုံးဝင်သော အလုပ်ဌာနများကို မှတ်ပုံတင်ခြင်း၊ အလုပ်သမားများကို မှတ်ပုံတင်ခြင်း၊ ထည့်ဝင်ကြေးကောက်ခံခြင်း၊ ငွေလက်ငင်း အကျိုးခံစားခွင့်ပေးခြင်းနှင့် အာမခံအလုပ်သမားများအား ဆေးဝါးကုသပေးခြင်းတို့ ဖြစ်သည်။ အလုပ်သမားများ၏ လုပ်ခလစာပေါ်မူတည်၍ အလုပ်ရှင်မှ သုံးရာခိုင်နှုန်း၊ အလုပ်သမားမှ နှစ်ရာခိုင်နှုန်း၊ စုစုပေါင်း ငါးရာခိုင်နှုန်း ထည့်ဝင်ကြေး ပေးသွင်းထားခြင်းအားဖြင့် ဆေးကုသမှုခံယူခွင့်ရှိသည့်အပြင် အာမခံစနစ်အလိုက် သတ်မှတ်ချက်များနှင့်အညီ ငွေကြေးအကျိုးခံစားခွင့် ၁၅ မျိုးကို ခံစားခွင့်ရရှိ မည်ဖြစ်ကြောင်း သိရသည်။
ရွှေ့ပြောင်းသွားလာခြင်း
ဝန်ကြီးဌာနအနေဖြင့် ရွှေ့ပြောင်းသွားလာခြင်းဆိုင်ရာ ကျား/မရေးရာ အလေးထားရမည့်ကိစ္စများနှင့် အမျိုးသမီးများကို ခွဲခြားဆက်ဆံမှု ပပျောက်ရေးသဘောတူစာချုပ် CEDAW Committee ၏ ရွှေ့ပြောင်းသွား လာမှု အကြံပြုချက်များနှင့်စပ်လျဉ်း၍ အသိပညာပေးနိုင်ရေး၊ မြန်မာနိုင်ငံ၏ ပြည်ပအလုပ်အကိုင်ဆိုင်ရာ ဥပဒေမူကြမ်းနှင့် ရွှေ့ပြောင်းသွားလာခြင်း ဆိုင်ရာ အမျိုးသားလုပ်ငန်း စီမံချက်တို့တွင် ရွှေ့ပြောင်းသွားလာ ခြင်း၌ တွေ့ကြုံရသော ကျား/မရေးရာ အလေးထားဆောင်ရွက်ရ မည့် ကိစ္စများပါဝင်စေရေးအတွက် ပြည်ပအလုပ်အကိုင်ဥပဒေ ပြင်ဆင်ရေးဆွဲခြင်းနှင့် ရွှေ့ပြောင်းသွား လာခြင်းဆိုင်ရာ အမျိုးသားလုပ်ငန်းစီမံချက်တို့တွင် ကျား/မ ရေးရာကိစ္စရပ်များ ထည့်သွင်းနိုင်ရေး အတွက် အမျိုးသားအဆင့် မူဝါဒဆိုင်ရာဆွေးနွေးပွဲဖြင့် ဆောင်ရွက်လျက်ရှိသည်။
ဝန်ကြီးဌာနအနေဖြင့် အတည်ပြုပြီး ဥပဒေ ကိုးခု၊ ပြင်ဆင်ရေးဆွဲလျက်ရှိသည့် ဥပဒေ တစ်ခု၊ အသစ်ရေးဆွဲလျက်ရှိသော ဥပဒေ သုံးခု၊ အပြီးရုပ်သိမ်းမည့် ဥပဒေ နှစ်ခု၊ လက်ရှိလိုအပ်သဖြင့် အသစ်ရေးဆွဲလျက်ရှိသည့် ဥပဒေ နှစ်ခုနှင့် အခြားဝန်ကြီးဌာနကို လွှဲပြောင်းပေးပြီး ဥပဒေတစ်ခု စုစုပေါင်း ဥပဒေ ၁၈ ခုထဲတွင် ၁၉၅၁ ခုနှစ် ရေနံမြေ (အလုပ်သမားနှင့် သက်သာချောင်ချိရေး) အက်ဥပဒေအား လျှပ်စစ်နှင့်စွမ်းအင်ဝန်ကြီး ဌာနသို့ လွှဲပြောင်းပေးပြီးဖြစ်သဖြင့် ဥပဒေ ၁၇ ခုဖြင့် အလုပ်သမားရေးရာဆိုင်ရာ ကိစ္စရပ်များအား စည်းကြပ်ဆောင်ရွက်လျက်ရှိသည်။ အသစ်ရေးဆွဲ လျက်ရှိ သည့် လုပ်ငန်းခွင် ဘေးအန္တရာယ်ကင်းရှင်းရေးနှင့် ကျန်းမာရေးဥပဒေ (မူကြမ်း)အား ပြည်ထောင်စုလွှတ်တော်သို့ ၂ဝ၁၇ ခုနှစ် ဖေဖော်ဝါရီ ၁၇ ရက်က ပေးပို့ထားပြီးဖြစ်ကြောင်း သိရသည်။
အငြင်းပွားမှုများ
ဝန်ကြီးဌာန၏ အလုပ်သမားရေးရာ အငြင်းပွားမှုများကို ဖြေရှင်းရာတွင် ပွင့်လင်းမြင်သာမှုရှိခြင်းအပြင် ရှေ့နောက်ညီညွတ်ခြင်းနှင့် အလုပ်ရှင်၊ အလုပ်သမားကြား ဘက်လိုက်မှုကင်း၍ လူမှုရေးရာ တရားမျှတမှုအပေါ် အခြေခံသည့် မျှတသောဆုံးဖြတ်ချက်များ ချမှတ်နိုင်ရေး အလုပ်သမားရေးရာ အငြင်းပွားမှုများကို ဖြေရှင်းဆောင်ရွက်ပေးမှုအပေါ် အများပြည်သူယုံကြည်လက်ခံနိုင်ရေး စက်ရုံတွင်း ဖွဲ့စည်းထားသည့် အလုပ်သမားရေးရာ လုပ်ငန်းညှိနှိုင်းရေးကော်မတီနှင့် မြို့နယ် ညှိနှိုင်းဖျန်ဖြေရေး အဖွဲ့တို့က တည်ဆဲဥပဒေ များနှင့်အညီ ဖြေရှင်းရန်လိုပြီး ခုံသမာဓိအဆင့်သို့ မလိုအပ်ဘဲ တက်ရောက်ခြင်းမဖြစ်စေရေး အပါအဝင် အတွေ့အကြုံများ၊ အားသာချက်၊ အားနည်းချက်များနှင့် စိန်ခေါ်မှုများကို ဆွေးနွေးနိုင်ခဲ့သည်။
၂ဝ၁၁ ခုနှစ် အလုပ်သမားရေးရာ အငြင်းပွားမှုဖြေရှင်းရေးဥပဒေနှင့်အညီ အဆင့်ဆင့် ဖြေရှင်းဆောင် ရွက် လျက်ရှိရာ မြို့နယ်အငြင်းပွားမှု ညှိနှိုင်းဖျန်ဖြေရေးအဖွဲ့ ၃၂၅ ဖွဲ့က ဖြေရှင်းဆောင်ရွက်ပေးခဲ့ပြီး ၁၉၂၃ ခုနှစ် အလုပ်သမားလျော်ကြေး အက်ဥပဒေအရ အလုပ်သမားရေးရာကိစ္စရပ်များကို ညှိနှိုင်းဖြေရှင်းဆောင်ရွက်ပေးလျက်ရှိရာ ၂ဝ၁၆ ခုနှစ် ဧပြီလမှ ၂ဝ၁၇ ခုနှစ် ဖေဖော်ဝါရီလအထိ အလုပ်သမားရေးရာအငြင်းပွားမှု ညှိနှိုင်းဖျန်ဖြေရေးအဖွဲ့များမှ ဖြေရှင်းဆောင်ရွက်ပေး ခဲ့သည့်အမှု ၂၇ ခုအတွက် ဆောင်ရွက်ပေးနိုင်ခဲ့သည်။
၂ဝ၁၁ ခုနှစ် အောက်တိုဘာ ၁၁ ရက်တွင် အလုပ်သမားအဖွဲ့အစည်းဥပဒေကို လည်းကောင်း၊ ၂ဝ၁၂ ခုနှစ် ဖေဖော်ဝါရီ ၂၉ ရက်တွင် အလုပ်သမားအဖွဲ့အစည်းနည်းဥပဒေကို လည်းကောင်း ပြဋ္ဌာန်းထုတ်ပြန်ပြီး အဆိုပါ အလုပ်သမားအဖွဲ့အစည်းဥပဒေအရ ၂ဝ၁၇ ခုနှစ် ဖေဖော်ဝါရီလအထိ အလုပ်ရှင်နှင့် အလုပ်သမားအဖွဲ့အစည်းများ ဖွဲ့စည်းပေးခဲ့ရာတွင် အလုပ်ရှင်အဖွဲ့အစည်း ၃ဝ၊ အလုပ် သမားအဖွဲ့အစည်း ၂၃၆၉ ဖွဲ့တို့ကို ဖွဲ့စည်း ပေးနိုင်ခဲ့သည်။
လူဦးရေနှင့် အိမ်အကြောင်းအရာ
၂ဝ၁၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းရလဒ်များကို အခြေခံ၍ သုတေသန စာတမ်း ၁၃ စောင်၊ သန်းခေါင် စာရင်း ရလဒ်မြေပုံများအတွက် လေ့လာဆန်းစစ် တွက်ချက်ခြင်းဆိုင်ရာ သင်တန်းများကို ဖွင့်လှစ်ပို့ချခဲ့ပြီး ခေါင်းစဉ်အလိုက် ထည့်သွင်းမည့် အချက်အလက် များပြင်ဆင်ခြင်း၊ Data User Workshop များ ပြုလုပ်ခြင်း၊ စာရင်းဇယားများပြုစုခြင်းနှင့် အစီရင်ခံစာများ ရေးသားပြုစုခြင်းတို့ကို ဆောင်ရွက်လျက်ရှိရာ မွေးဖွားခြင်းနှင့် လက်ထပ်ထိမ်းမြားခြင်း၊ သေဆုံးခြင်းနှင့် သားဖွားမိခင်သေဆုံးခြင်း၊ လူဦးရေပြောင်းလဲခြင်း၊ ရွှေ့ပြောင်းသွားလာခြင်းနှင့် မြို့ပြထွန်းကားလာခြင်း စာတမ်းများ ထုတ်ပြန်ခဲ့ပြီးဖြစ်သည်။
အဆိုပါထုတ်ပြန်ခဲ့သော အစီရင်ခံစာစာအုပ်များနှင့် သုတေသနစာတမ်းများကို ပြည်သူ့လွှတ်တော်၊ အမျိုးသားလွှတ်တော်၊ ဝန်ကြီးဌာနများအားလုံးနှင့် ဝန်ကြီးဌာနများအောက်ရှိ ဦးစီးဌာနနှင့်လုပ်ငန်းများ၊ ပုဂ္ဂလိက အဖွဲ့အစည်းများ၊ စာကြည့်တိုက်များ၊ မော်ကွန်းတိုက်များ၊ တက္ကသိုလ်/ကောလိပ်များ၊ မြန်မာနိုင်ငံအခြေစိုက် နိုင်ငံခြားသံရုံးများ၊ နိုင်ငံခြားရှိ မြန်မာသံရုံးများ၊ စစ်သံရုံးများ၊ အစိုးရမဟုတ်သော အဖွဲ့အစည်းများနှင့် အချက်အလက်အသုံးပြုသူများအားလုံးသို့ ဖြန့်ဝေခဲ့သည်။
သန်းခေါင်စာရင်း အချက်အလက်များ ဖြန့်ဝေခြင်းနှင့် အချက်အလက်အသုံးပြုသူများ လွယ်ကူစွာ ရရှိနိုင်စေရန်၊ နိုင်ငံတော်တွင် ဆောင်ရွက်နေသော စီမံကိန်းများကို အကောင်အထည်ဖော်ရာတွင် မူဝါဒများစိစစ်ခြင်းနှင့် အကဲဖြတ်ခြင်း၊ စီမံခြင်းတို့ကိုဆောင်ရွက်ရာ၌ သန်းခေါင်စာရင်း အချက်အလက် များ အသုံးပြုမှုတိုးမြင့်လာစေရန်၊ အချက်အလက်အသုံးပြုသူများ၊ မီဒီယာများနှင့် ပြည်သူများအကြား သန်းခေါင်စာရင်းဆိုင်ရာ အချက်အလက်များကို အကျိုးရှိစွာ၊ အဓိပ္ပာယ်ပြည့်ဝစွာ အသုံးပြုနိုင်ရန် ရည်ရွယ်ခြင်းဖြစ်သည်။
ဖြေလျှော့
အမျိုးသားမှတ်ပုံတင်နှင့် နိုင်ငံသားဦးစီး ဌာနအနေဖြင့် နိုင်ငံတော်အတွင်းနေထိုင်သည့် ပြည်သူများ၏ ပညာရေး၊ စီးပွားရေး၊ လူမှုရေးကိစ္စရပ်များတွင် အထောက်အကူဖြစ်စေရန်အတွက် ၁၉၈၂ ခုနှစ် မြန်မာနိုင်ငံသားဥပဒေ နှင့်အညီ ကိုင်ဆောင်သင့်သည့် လက်မှတ်တစ်မျိုးမျိုးကိုရရှိစေပြီး နိုင်ငံတော်မှ သတ်မှတ်သည့် ဥပဒေပါ နိုင်ငံသားအခွင့်အရေးများကို ရရှိခံစားနိုင်ရေးအတွက် ဖြေလျှော့မှု နည်းလမ်းများကိုအသုံးပြု၍ သစ္စာစီမံချက်ဖြင့် အစိုးရသစ်၏ ပထမတစ်နှစ်တာကာလအတွင်း နိုင်ငံသားစိစစ်ရေးကတ်ပြား ၁ဝ၃၄၆၅၈ ကို ထုတ်ပေးနိုင်ခဲ့သည်။
မြန်မာနိုင်ငံအတွင်း နေထိုင်သူများအနက် အချို့သော ပြည်သူများသည် လူမှုရေး၊ စီးပွားရေး၊ ပညာရေး စသော အကြောင်းအမျိုးမျိုးဖြင့် တစ်နေရာမှတစ်နေရာသို့ ရွှေ့ပြောင်းနေထိုင်ကြပြီး ထိုသူအများစု သည် ရောက်ရှိ နေထိုင်ရာအရပ်ဒေသတွင် ဥပဒေနှင့်အညီ နေထိုင်နိုင်ရေးအတွက် ကာယကံရှင်များ ကိုယ်တိုင်က မူလနေထိုင်ရာအရပ်ဒေသမှ ပြောင်းရွှေ့ပုံစံ (၁ဝ) ထုတ်ယူ၍ ရောက်ရှိနေထိုင်ရာ ဒေသတွင် တရားဝင်အိမ်ထောင်စု လူဦးရေစာရင်း ဆောင်ရွက်ရမည်ဖြစ်သော်လည်း အခြေအနေ အကြောင်းအမျိုးမျိုးဖြင့် မဆောင်ရွက်နိုင်၍ ရောက်ရှိရာဒေသတွင် အိမ်ထောင်စုလူဦးရေ စာရင်းမရှိသဖြင့် လူမှုရေး၊ စီးပွားရေး၊ ပညာရေးအခက်အခဲများ ကြုံတွေ့နေကြရသည်။
အဆိုပါ ရွှေ့ပြောင်းနေထိုင်သူ တိုင်းရင်းသားများကြုံတွေ့နေရသော အခက်အခဲများ ပြေလည်စေရန် ယခင် အိမ်ထောင်စုလူဦးရေစာရင်း လျှောက်ထားဆောင်ရွက်ရမည့် လုပ်ငန်းစဉ်အားဖြေလျှော့ပြီး ကာယကံရှင်များ ကိုယ်တိုင်အား မူလနေထိုင်ရာဒေသသို့ ပြန်လည်စေလွှတ်ခြင်းမပြုဘဲ သက်ဆိုင်ရာ မြို့ နယ်ရုံးအချင်းချင်းချိတ်ဆက်၍ သတ်မှတ်ချက်နှင့်အညီ စိစစ်မှန်ကန်ပါက လက်ရှိရောက်ရှိ နေထိုင်သည့်ဒေသတွင်ပင် အိမ်ထောင်စုလူဦးရေစာရင်း ဆောင်ရွက်ထုတ်ပေးပြီး နိုင်ငံသားစိစစ်ရေး ကတ်ပြား ဆောင်ရွက်ပေးသည့်လုပ်ငန်းစဉ်အား ဖြေလျှော့ဆောင်ရွက် ပေးလျက်ရှိသည်။
တိုင်းရင်းသား မဟုတ်သူများနှင့် သွေးနှော လူမျိုးများ၏ နိုင်ငံသားစိစစ်ရေးကတ်ပြား လျှောက်ထားမှု များတွင် ပြည်သူများ ပိုမိုလွယ်ကူမြန်ဆန်စွာရရှိစေရန် နိုင်ငံသားစိစစ် ရေးကတ်ပြားလျှောက်ထားမှုတွင် မြို့နယ်ဦးစီး မှူးမှ စိစစ်တင်ပြပြီး ခရိုင်ဦးစီးမှူးမှ နိုင်ငံသားစိစစ်ရေးကတ်ပြား လက်မှတ်ရေးထိုး ထုတ်ပေးရန် ၂ဝ၁၆ ခုနှစ် နိုဝင်ဘာလမှစ၍ လုပ်ထုံးလုပ်နည်းအား ဖြေလျှော့ဆောင်ရွက်ပေးခဲ့သည်။




No comments:

Post a Comment